foto1
foto1
foto1
foto1
foto1
บ่ทันพอได๋หันใจถิ่มกะฮอดปลายปีแล้วเด้อพี่น้อง ทั้งบักพยาธิโควิด-19 ที่บ่ทันจางไป แถวบ้านอาวทิดหมูยังติดอันดับ 10 ของประเทศอยู่เลย หลังจากหมดพายุฟ้าฝนผ่านไปแล้ว ตอนนี้กะฮอดยามหนาววอยๆ มาอีกปี นอนผู้เดียวเปลี่ยวอุราคือเก่า สาวๆ สำใหญ่ส่ำน้อยเพิ่นกะแนมกายอาวทิดหมูคนผู้ฮ้ายไปเบิด แม่ฮ้างแม่หม้ายเพิ่นกะว่าแต่ผู้ข้าสิตั๋วสิต้ม กะเลยบ่ชายตามาหา กะคือสิได้นอนหนาวกอดผ้าห่มอยู่กระท่อมน้อยฮิมมูล หาปูปลาเลี้ยงปากเจ้าของผู้เดียวนี่หล่ะ สู้ๆๆ ต่อไปเด้ออาว!

: Our Sponsor ::

adv200x300 2

: Facebook Likebox ::

: Administrator ::

mail webmaster

: My Web Site ::

krumontree200x75
easyhome banner
ppor 200x75
isangate net200x75

No. of Page View

paya supasit

ju juทุกข์บ่มีเสื้อผ้า ฝาเฮือนเพกะพออยู่ ทุกข์บ่มีข้าวอยู่ท้อง นอนลี้อยู่บ่เป็น

        ## ความทุกข์เพราะขาดแคลนเสื้อผ้าที่อาศัยพอทนได้ แต่ท้องกิ่วนี่นอนหลับไม่ได้จริงๆ @ความจนทนไม่ไหว ##

paya

ผญาเกี้ยวพาราสีโต้ตอบหนุ่มสาว

(คำที่ปรากฏในผญาเหล่านี้ให้อ่านออกสำเนียงตามภาษาอีสานครับ ไม่ได้พิมพ์ผิดแต่อย่างใด)

  • (ชาย) .... สุขซำบายหมั้นเสมอมันเครือเก่าบ่นอ เทิงพ่อแม่พี่น้องซำบายถ้วนอยู่สู่คนบ่เด
  • (หญิง) .... น้องนี้ สุขซำบายหมั้น เสมอมันเครือเก่าอยู่ดอกอ้าย เทิงพ่อแม่พี่น้องซำบาย พร้อมสู่คน
  • (ชาย) .... อ้ายนี่อยากถามข่าวน้ำ ถามข่าวเถิงปลา ถามข่าวนา อยากถามข่าวเถิงเข้า อ้ายอยากถามข่าวน้องว่ามีผัวแล้วหรือบ่ หรือว่ามีแต่ซู้ ผัวสิซ้อนหากบ่มี
  • (หญิง) .... โอนอ อ้ายเอย น้องนี้ปอดอ้อยซ้อยเสมอดั่งตองตัด พัดแต่เป็นหญิงมาบ่มี ซายสิมาเกี้ยว ผัดแต่สอนลอนขึ้นบ่มีเครือสิเกี้ยวพุ่ม พผัดแต่เป็นตุ่มไม้เครือสิเกี้ยวกะบ่มี
  • (ชาย) .... น้องอย่ามาติแถลงเว้า เอาเลามาปลูก บ่แหม่นเซื้อซาติอ้อยกินได้กะบ่หวาน
  • (หญิง) .... คันบ่จริงน้องบ่เว้า คันบ่เอาน้องบ่หว่า คันบ่แม่นท่า น้องบ่ไล่ควายลง ตีลงแล้ว ถอยคืนมันสิยาก มันสิลำบากน้องเทียวหยุ่งอยู่บ่เซา
  • (ชาย) .... อ้ายนี่เป็นดังอาซาไนม้า เดินทางหิวหอด มาพ้อน้ำส้างแล้วในถ้ำกะส่องดาย กลายไปแล้ว ผัดคืนมาก้มส่อง อยากกินกะกินบ่ได้ เลียลิ้นอยู่เปล่าดาย
  • (หญิง) .... น้องนี้เป็นดังเฮือคาแก้ง เสาประดงคุงหาด หาผู้คึดซ่อยแก้ ให้หายฮ้อนกะบ่มี
  • ไขกะไขมาถ้อนไขแปวป้านเป่ง คันบ่ไขเป่งท้างทางนั้นสิขาดเขิน
  • คำปากเจ้าบอกว่าไหลไหล หัวใจเจ้าบอกว่าเลี้ยวเลี้ยว
    เจ้าหากฝังเกี่ยวไว้ในหั้นหมื่นดวง บ่ฮู้
  • คองกินน้องช้างสามปีขี้บ่ออก คองเอาลูกพระเจ้าเลยสิเถ้าแก่ตาย
  • คองกินน้องช้างสามปีขี้บ่ออก ออกแต่ขี้กำพร้าสามก้อนท่อศาลา
  • คราวเมื่อเว้าหมายสิเอามาจี่ บาดว่ามาฮอดแล้วสังบ่ปิ้งจี่กิน
  • คราวเมื่อเว้าแต่กี้ว่าสิตบแผ่นแป้นแปนมือให้นางนั่ง
    บาดว่ามาฮอดแล้วจำให้นั่งหนาม

isan banhao 7

alert2บ่... อยากลาจาก...

        ปลาสิไลลาน้ำคำเอยสิเอิ้นสั่ง
คำสิไกลสายสร้อยกลอยมันสิลาป่า
ปูปลาสิลาน้ำเข้าก่ำสิลาหนอง
หนองสิลาน้ำนาทามสิลาท่ง
นับมื้อไกลกันแล้วหัวเฮือสิลาฝั่ง
หมากข่างไกลหมากกลิ้งซิงสิไห้ต่อนกทา
ดวนดันหอมสิห่างกอไกลต้น
ฮวกสิลาแม่น้ำนางน้อยค่อยอยู่ดี
ด้งสิลาม้อนสวนมอนสิลาจ่อ
สีสิลาหน้า บาทาสิลาเกิบ
นอสิลาช้าง เสือสางสิลาป่า
ทวนสิลาหญ้าฝาเฮือนทังดวด
ชั่งสิไกลลูกโต้นคนสิไห้แอ่วนำ
หมาสิลาเข้าปั้นกระสันให้แอ่วนำ
บัวทองสิลาบึงบ่าวพี่ชายสิลาน้อง
ผมป่งลากระโด้นหวีสิซันบ่อนใด
ดอกสมั่งลาจากต้นฟานเอยสิลาหน่าง
กาสิไลไก่น้อยอ้อยสิห่างฮามสวน
ฝนสิลาฟ้าปูปลาสิลาบวก
ปลีสิลากล้วยควายบักเลสิลาท่ง
ปอสิลาเชือกอ้อง ควายนั้นค่อยอยู่ดี
เสิบสิลาปี่แอ้ แคนไค้ขลุ่ยซอ
สาสิลาหญ้ากวยยาสิลาข้วน
ติบนวดลากะเช้าบอกปูนนั้นค่อยอยู่ดี
(ผาแดง)     

 

isan banhao 9

 next arrowsคลิกอ่านต่อ  

redline

backled1

paya

ผญาเกี้ยวพาราสีทั่วไป

  • ฝันคืนนี้ฝันเป็นประหลาดต่าง ฝันว่าเสาเฮือนเนิ้งไปทางตะวันออก
    ฝันว่าปอกมีดโต้ตกน้ำล่องหนี ฝันว่าธำมะรงเหลื้อมในมือกระเด็นแตก
    เกรงว่านาถเจ้าใจเลี้ยวจากเฮียม

    ฝันคืนนี้เป็นฝันประหลาด ฝันว่าเสาเรือนเอียงไปทางทิศตะวันออก ฝันว่าปลอกมีดตก
    น้ำไหล ฝันว่าแหวนเพชรในมือหล่นแตก เกรงว่าจะเป็นลางร้ายหรือน้องจะจากไป
  • ฝันคืนนี้ฝันเป็นประหลาดต่าง ฝันว่าช้างเผือกผู้พระอวนเจ้าขึ้นขี่คอ
    เฮียมก็ผันผยองขึ้นเทิงหัวช้างใหญ่ เฮียมกะหนีบ่ได้ ไกลเจ้าคืบวา

    ฝันคืนนี้ช่างประหลาด ฝันว่ามีช้างเผือกของหนุ่มบ้านอื่นมารับเอาน้องหนีไปไกลลับตา
  • เว้าชู้ต่างบ้านปานฝากไข่ไว้นำกา ฝากปลาไว้นำแมว
    ฝากแหลวไว้นำไก่น้อย ฝากก้อยไว้นำหมาขี้เฮื้อน มันสิม้ามเมื่อใด

    มีคนรักต่างบ้านก็เหมือนฝากไข่ไว้กับกา ฝากปลาไว้กับแมว ฝากเหยี่ยวไว้กับไก่
    ฝากลาบก้อยไว้กับหมา ไม่รู้มันจะงาบเมื่อไร?
  • ให้น้องเลี้ยงพี่ไว้ตางหมาหอนเห่า บาดชู้เก่ามาฮอดแล้วไลถิ้มบ่ว่าสัง
  • ว่าแม่นเสือกินรื้อสังบ่เห็นฮอยลาก ว่าแม่นนาคกินรื้อสังบ่เห็นฮอยแก่
    หรือแม่นเงือกปากแหล้ หรือแม่นแข้ปากกว้างเอาเจ้าเข้าเวิ่นวัง

    ถ้าว่าเสือกินทำไมไม่เห็นรอยลาก ถ้าว่านาคกินทำไมไม่เห็นรอยลาก หรืออาจเป็นเงือกหรือจรเข้เอาน้องไปซ่อนไว้หนใดหนอ
  • สิบปีกะสิถ้าซาวพรรษากะสิอยู่ คันบ่ได้เป็นคู่เห็นแต่อุแอ่งน้ำกะปานได้นั่งเทียม
    สิบปี ยี่สิบปีก็จะรอน้องอยู่ ถึงไม่ได้เคียงคู่น้องมองเห็นแค่ตุ่มใส่น้ำก็เหมือนได้นั่งเคียง
  • อย่าให้เสียแฮงอ้ายเดินทางหิวหอด คือดั่งม้าอยากน้ำเดือนห้าหอดหิว
    คันบ่กูร์ณาอ้าย เห็นสิตายม้อยระแหม่ง เห็นสิตายหอดแห้งหิวน้ำหอดแฮง

    อย่าให้เสียแรงที่พี่ต้องดั้นด้นมาหา ได้โปรดกรุณารับไมตรีพี่ไว้อย่าแล้งน้ำใจนักเลย
  • พี่สิลาจากน้องกลับต่าวเคหัง ปาสิลาวังเวินเสิ่นไปคือฮุ้ง ทุงสิไลลาผ้า
    สาหนองสิลาบวก ฮวกสิลาแม่น้ำ นางน้องค่อยอยู่ดี แด่เนอ

    พี่ต้องลาจากน้องไปแล้ว เหมือนปลาที่ลาจากน้ำ นกลาจากหนอง ขอให้น้องอยู่สุขสบายดีนะ
  • พี่นี้บ่มีต้นกล้วยจึงได้เหนี่ยวหาตอง บ่มีสองจิ่งได้มาหาน้อง
  • พี่นี้ปลอดอ้อยซ้อย เสมออ้อยกลางกอ กาบกะบ่ห่อ หน่อน้อยกะบ่อซอน
    ชู้บ่ช้อนเมียอ้ายบ่มี

    พี่นี้ยังเป็นโสด ไร้คู่ใจเหมือนต้นอ้อยกลางกอ จึงได้มุ่งหมายมารักน้อง
  • พี่หากใจประสงค์ปล้ำยูงยางไม้ใหญ่ คันแม่นพร้าบ่บ่าน ขวานบ่เป้
    ไม้บ่ล้ม อวนอ้ายบ่เซา

    พี่นี้ตั้งใจเด็ดเดี่ยวแล้ว (รักน้อง) ว่าจะตัดต้นไม้ใหญ่ แม้นพร้าและขวานไม่บิ่น ไม้ไม่ล้ม (น้องไม่ตกลง) พี่นี้ไม่เลิกลา
  • นกเขาตู้พรากคู่กะยังขัน กาเวาวอนพรากฮังกะยังฮ้อง
    น้องพรากอ้ายคำเดียวบ่เอิ้นสั่ง คันบ่เอิ้นสั่งใกล้ขอให้เอิ้นสั่งไกล

    นกพรากคู่พรากรังยังร้องเพรียกหา แต่น้องจากพี่ไปไม่มีแม้คำร่ำรา
  • ขันตีตั้งสัจจังหมั้นเที่ยง บ่ได้คึดเบี่ยงเลี้ยวลวงล้อหลอกใผ ปานใดเดสิได้จูงแขนเข้า
    พาขวัญป้อนไข่หน่วย มือขวาป้อนไข่อ้าย มือซ้ายป้อนไข่นาง

    พี่นี่ตั้งใจมั่นรักน้องไม่เคยคิดเปลี่ยนใจ แล้วเมื่อไหร่หนอจะได้จูงมือน้องเข้าสู่หอ (พิธีบายศรีสู่ขวัญงานแต่งงานชาวอีสาน จะมีการป้อนไข่ต้มแก่คู่บ่าวสาว ดูรายละเอียดใน ขนบธรรมเนียมประเพณีบ้านเฮา การสูตรขวน)
  • คันบ่แน่บ่ยิง บ่จริงอย่าเว้า บ่เอาบ่ว่า รับฟ้าผ่าห่าตำกะได้ ใจนั้นเที่ยงชัน
    ไม่แม่นไม่ยิง ไม่จริงไม่พูด ไม่อยากได้ไม่ขอ ให้ฟ้าผ่าก็ได้ใจพี่นี้มั่นคง (รักน้องจริง ๆ)
  • ข้าขออะธิษฐานตั้งขอฝากพระไมติ์มิตร พันธนังติดหมื่นปีบ่ไลน้อง
    พี่นี้จงจิตข้องหมายตายเกิดฮ่วม ขออย่าคละคลาดแคล้วคำหมั้นขอดสาร น้องเอย

    ขออธิษฐานต่อสิ่งศักดิ์สิทธิ์ทั้งหลาย จะรักน้องจนตายแม้เกิดชาติหน้าหรือชาติไหน ใจพี่ยังมั่นคง นะน้องเอย

isan banhao 6

  • ใจหนึ่งว่าอยากงมปลาปิ้งกลางทะเลให้เขาซ่า สาเด
    ใจหนึ่งว่าอยากถมแม่น้ำให้เป็นพื้นแผ่นเดียว

    อยากจับปลากลางทะเลมาปิ้งให้คนลือ อยากถมผืนแม่น้ำให้เป็นแผ่นดินเดียวกัน (เพื่อน้องคนเดียว)
  • ใจหนึ่งว่าอยากหย้อแม่น้ำให้เป็นแผ่นดินเดียว
    คราวสองคืนสามคืนอยากหย้อเป็นคราวมื้อ

    ใจอยากจะบีบแม่น้ำให้เป็นแผ่นดินเดียวกัน อยากย่อวันเวลาลงมาเพื่อให้ได้ใกล้ชิดน้อง (คิดถึงมาก ไม่อยากห่างไกล)
  • ใจประสงค์แล้วเมืองแกวกะดั้นฮอด ใจประสงค์ยอดแก้วในถ้ำกะก่นหา
    เมื่อมีใจรักน้องแม้จะอยู่แดนไกลเพียงใด ก็จะติดตามถามหา
  • ต้นไม้ใหญ่บ่มีผีสาวผู้ดีบ่มีชู้ธรณีบ่อกแตกสารือ ตาแฮกเปิดไก่ต้มดินชิแห้งไง่ผง
  • ให้ค่อยไปดีเยอเจ้าผู้หงส์คำผ้ายเวหาเหินเมฆ กาดำเอิ้นจ้อยจ้อยให้อวนเจ้าอ่วยคืน
  • สิบคนมานั่งแหนแสนคนมานั่งเฝ้า บ่ปานเงาน้องมาเหลื่อม
  • ทังหลายเพิ่นเมาเหล้าเมาชายาฝิ่น พี่นี้เมาแม่ฮ้างแม่หม้ายปานเอ้าอูดกระแต
  • อย่าได้หึงหวงห้ามไปมาให้มีหมู่ ฮอดฮ่มไม้ยังชิได้หยอกกัน
  • พี่นี้เทียมดั่งอัศดรม้าทรงอานบ่มีหิ่ง ช้างหากห้างแหย่งแล้วพวงชิช้อนกะบ่มี
  • คันหากมีสองแล้วบ่กลัวใผอย่าฟ้าวว่า บาดห่าเป็นฮ้างหม้ายชิมาโอ้ใส่เขา
  • ปลาดุกบ้อนชมนอนหลังหาด ปลาหลาดบ้อนชมหมากก้านเหลือง
    เคืองใจเจ้าเซากันสาก่อน พ่อแม่น้องบ่พร้อมบุญส้วมอ้ายบ่มี
  • อย่ามาตั๋วให้หล้มตกหล่มดินทราย ตั๋วให้กำทรายผงหว่านลงในน้ำ
    ตั๋วให้เฮียมหลงหล้มตกตมทังหล่ม ตั๋วให้พาดลาดล้มกลางบ้านหมื่นชะเล
  • พี่นี้แนวผู้ฮ้ายอ่างพ่างพุงกระทิ ปากแหลมคือปลาหลด อดหนาวบ่ได้ เห็นน้ำแต่อยากโตน
  • เฮียมนี้เป็นดั่งนาไฮ่หล้งประสงค์หาแต่กล้าแก่ กล้าอ่อนมีบ่แพ้นาหล้งบ่ประสงค์
  • บ่ได้พาโลล้นดำนาหลายท่ง คึดต่อเจ้าต้งหล้งนาเฮื้อไฮ่เดียว นี้แล้ว
  • ตั๋วให้นางรออ้ายลอหลายเลยชิบอด รอไปฮอดมื้อเถ้าเซาจ้อยโซดบ่อเอา
  • แม่ฮ้างนี้หายากนานพบ ใผผู้ทำบุญหลายจึ่งหวนเห็นพ้อ
    ใผผู้ทำบุญน้อยกลายหนีฮ้อยส่วน พี่นี้ปรารถนาพบพ้อแนวฮ้างคุขี้ยาง
  • ช่างมาติแถลงหล้มตมบ่มีกะติลื่น ตั๋วให้กลืนกินก้างคาค้างอยู่ลักลาน
    ยามจาต้านนำกันว่าแต่มัก มักอยู่นี้หนีแล้วเล่าลืม
  • ใผอยากเห็นใจอ้ายให้มืนตาใส่น้ำแจ่ว คันมันแสบแจ้วแจ้วใจอ้ายก็ดั่งเดียว นั้นแล้ว

isan banhao 8

next arrows คลิกอ่านต่อ   ผญาเกี้ยวพาราสีโต้ตอบหนุ่มสาว

redline

backled1

paya

ผญาภาษิตสะกิดใจ

  • ความลับบ่มีให้เถิงสาม ความงามบ่ให้เถิงสี่ ความมิดความมี่บ่ให้เถิงห้าเถิงหก
  • ความดีฝังไว้เก้าศอก ความชั่วชักออกมาเก้าวา
  • ใจหนักได้กินข้าว ใจเบาได้กินกลอยหัวใหญ่
  • เจ้านายดีบ่เห็นแก่เงินแสนไถ่ แต่เห็นแก่ไพร่แสนเมือง
  • เอาลูกใภ้มาเลี้ยงย่า ปานเอาห่ามาใส่เฮือน
    เอาย่ามาอยู่นำลูกใภ้ ปานเอาไข้มาใส่เฮือน
    เอาลูกเขยมาเลี้ยงพ่อเฒ่า ปานได้ข้าวเต็มเล้าเต็มเยีย
  • หนูกินม้อน จั่งเห็นคุณแมว ลูกแขวนแอว จั่งเห็นคุณพ่อแม่
  • กินแม่นปาก อยากแม่นท้อง เทียวขี้แม่นขา
  • แจงแวงน้ำ ทาวหาบ่เห็นต่อน ซดแต่น้ำ คาแข้วแสม่งตาย
  • ไฟไหม้ป่าจั่งเห็นหน้าหนู น้ำท่วมฮูจั่งเห็นจิหล่อ
  • บ่มีความฮู้อย่าเว้าการเมือง บ่นุ่งผ้าเหลืองอย่าเว้าการวัด
  • เป็นนายให้ฮักไพร่ เป็นใหญ่ให้ฮักลูกบ้าน ขี้คร้านให้ค่อยเพียรจา
  • อย่าได้ไลลืมถิ้มผักกะเดาทวนเก่า บาดได้กินลาบก้อย ยังสิโอ้อ่าวหา
  • เข่า (ข้าว) เต็มเล้านั่งเว้ากะคือ เงินเต็มถังเว้าหยังกะได้
  • ทุกข์บ่มีเสื้อผ้า ฝาเฮือนเพกะพออยู่ ทุกข์บ่มีข้าวอยู่ท้อง นอนลี้อยู่บ่เป็น
  • ทังหลายเพิ่นแพงซิ้นปูปลายามอึดอยาก ความปากความเว้าบ่ได้ซื้อแพงไว้เฮ็ดอิหยัง
    คนทั้งหลายเขาหวงแต่เนื้อปูปลายามอดอยาก แต่คำพูดนั้นไม่ได้ซื้อจะหวงไว้ทำไม (เอ้า!.. ส่งเสียงหน่อย)

Paya isan 04

  • เฮียมนี้เป็นคนน้อยสติลอยมันบ่เคี่ยม เจียมปากเจียมวาดไว้ยามสลั้งก็หากมี
    ลางเทื่อโมโหหุ้มโมหังบังเบียด ปากบ่สมวาทเว้าคำนั้นก็อย่าถือ
  • เฮียมนี้เป็นดังมดแดงเฝ้าอัมพามี้ม่วง กินกะกินบ่ได้คอยเฝ้าตั้งแต่ใบ
  • เฮียมนี้เป็นดั่งควายเห็นหญ้าในนาเขียวอ่อน กินกะกินบ่ได้เลียลิ้นเปล่าดาย
  • เฮียมนี้ปลอดอ้อยซ้อยเสมอดั่งตองตัด ผัดแต่เป็นญิงมาบ่มีชายซ้อน
  • เฮียมนี้เป็นดั่งตาลปลายด้วนโกนโกอยู่กลางท่ง ฮากบ่เหลือเครือบ่เกี้ยวโทนโท้อยู่แต่ลำ
    คันเครือขิกบ่มาเกี้ยวใบ เครือหวายบ่มาเกี้ยวก้าน ตาลต้นส่วนอยู่พลอยแท้แล้ว
  • เฮียมนี้เป็นดั่งกาสาผ้าสะใบบางผืนเก่า เขาหากตุ้มห่มแล้วชิไลถิ้มบ่คอย
  • เฮียมนี้เป็นดั่งเครือเขืองค้างคาดินดายเปล่า ว่าชิขึ้นเกี้ยวค้างลำไม้กะบ่มี
  • เฮียมนี้เป็นดั่งปลาเข็งข้อนหนองนาน้ำเขินขาด คันบ่ถิ้มใส่น้ำวังกว้างกะส่วนตาย
  • เฮียมนี้จิตบ่มีบ่แขวนแนนบ่มีบ่อนห้อย เสมอแคมม้าปล่อย จิตบ่มีบ่อนยั้งเสมอน้ำหลั่งไหล
  • เฮียมนี้เป็นดั่งเฮือแซมน้ำนทีฟองเฟือนฟาด คอยชิจมอยู่เรื่อยลงพื้นแม่นที ทุกข์แต่ในโลกาบ่มีใผเพี้ยง
  • เฮียมนี้คือดั่งนาไฮ่หล้งบ่สมโพนขี้หมาจอก นานอกบ้านบ่สมบ้างดากควาย ดอกตี
  • เฮียมอยากผ่าเอาหัวอกจกเอาไส้ตับไตออกเบิ่ง ย้านแต่ใจเพิ่นนั้นดำปี้ดั่งถ่านไฟ นั้นแล้ว
  • เฮียมนี้ดั่งปลาเข็งข้อนหนองนาน้ำเขินขาด ฝนบ่มาโผดให้ชิตายแล้งแดดเผา
    คึดต่อดอกขัดเค้าบานอยู่กลางดง คึดต่อเครือพายสงเล่าบ่มีลำเกี้ยว
  • เฮียมนี้เป็นดั่งหีนคาค้างกลางชะเลบ่มีค่า มีแต่คองแช่น้ำจมปิ้งอยู่ชะเล
ที่มา : สารานุกรมภาษาอีสาน-ไทย-อังกฤษ โดย ดร.ปรีชา พิณทอง

 

bullet มีแล้วอย่าหยิ่ง

เห็นว่ามีสุขแล้วผักตำนิลบ่อยากเบิ่ง
เห็นว่ามีสุขแล้วบ่เหลียวแลพวกเพื่อน
ในโลกนี้บ่ห่อนอยู่เดียวเป็น
คันว่ามีผืนผ้าบ่หาแพรพาดบ่า

คันได้กินต่อนซิ้นปลากั้งบ่อยากเหลียว
คันบ่สุขอยู่เรื่อยสิเหลียวหน้าเบิ่งไผ
อยู่แต่คนเดียวดายบ่ห่อนเป็นเมืองบ้าน
สินุ่งแต่ผ้าไปได้จั่งใด๋

 

bullet ผู้เฒ่า สารพัดผู้เฒ่าที่อาจจะตรงกับคนใกล้ตัวของคุณบ้าง

คันแม่นผู้เฒ่าบ่เข้าวัดฟังธรรม
เขาสินินทาท้วงติเตียนทั้งโลก
เขาสิว่าเฒ่าแก่แดดบ่เหลียวเบิ่งทางตม
เขาสิว่าเฒ่าแข้วว้ำบ่เหลียวเบิ่งทางธรรม

เขาสิกำดินพึกใส่โฮยนำหน้า
เขาสิสับโขกเว้าคนเฒ่าบ่ดี
เขาสิว่าเฒ่าแก่ลมบ่เหลียวเบิ่งทางหน้า
เขาสิบ่ยำแยงนบท่อใยยองน้อย

เถ้าแก่แล้วหลงโลบเมียสาว
เถ้าซู้หลู้นอนส้วมนำเมีย
เถ้ามักป้อยเอิ้นห่าเอิ้นหูง
เถ้าฮ้างบ้านหาห่างหามี
เถ้าว้ำเว้าตึกช้อนตึกแห
เถ้าคนใบ้ฮักเพิ่นชังโต
เถ้าอุดอู้หาสร้างแต่เวร
เถ้าย่านลื่นการไฮ่การสวน
เถ้าเก่งกล้าศีลห้าบ่มี
เถ้าใจบ้าฮักแต่ลูกหลาน
เถ้าเค้าเม้านั่งเฝ้าแต่เฮือน
เถ้าเห็นใกล้ภายหน้าบ่เหลียว

เถ้าหัวขาวมักเฝือนหาชู้
เถ้าซำเซียนำสาวส่ำน้อย
เถ้าหัวสูงศีลทานบ่สร้าง
เถ้าอัปรีย์ฆ่าสัตว์กินเหล้า
เถ้าตาแฉะวางหลานบ่ได้
เถ้าโมโหความตายบ่ฮู้
เถ้าทำเข็ญสอนแต่ผู้อื่น
เถ้าชักชวนลูกหลานไปค้า
เถ้าบ่ดีวันศีลเข้าป่า
เถ้าใจมารบุญโตบ่เว้า
เถ้าบิดเบือนฟังธรรมบ่ได้
เถ้าคันเคียวสามซาวว่าหนุ่ม

จาก : กาพย์ปู่       

แนวคนเถ้าใจเบาเคียดง่าย
ลางเถ้าพุมพุมป้อยกลางคืนแต่ก่อนไก่
ลางเถ้าพาโลล้นโลภาโลบล่าย
ลางเถ้าเป็นคนหัวขาวจ่อนพ่อน
ลางเถ้าเฮฮนดิ้นคือกะบวนสาวบ่าว
ลางเถ้าตีงโตได้ไปมาดิ้นด่าวด่าว
ลางเถ้าหัวขาวแล้วเอวกะแงนดากกะแอ่น
ลางเถ้าโสดาดิ้นหลงหลายเป็นตาหน่าย
ลางเถ้าเป็นคนเถ้าเอาแต่หลานไล่แต่ไก่
ลางเถ้าหลงลืมเถ้ามัวเมาว่ายังหนุ่ม
ลางเถ้าโมโหฮ้ายเหลือหลายตั้งแต่จ่ม
ลางเถ้าวาจาต้านคำใดตั้งแต่ด่า
ลางเถ้าเป็นคนเถ้ากินกลอยป้อยเก่ง
ลางเถ้าเป็นคนช้าทำการบ่ทันเพิ่น
ลางเถ้าเป็นคนเถ้าศีลธรรมบ่ได้ฮ่ำ
ลางคนเป็นคนเถ้าหัวขาวจนปากฟ่าว

ใจดีท่อหมากฝ้ายใจฮ้ายท่อหมากตูม
เอาแต่ความขี้ฮ้ายมาให้ลูกหลาน
กินหลายกะด่าป้อยกินน้อยกะใส่เวร
ยังเล่าเลาะห่อนเหล้นเชิงชู้สวากเสน่ห์
กระดูกชิเข้าหม้อบ่ทันฮู้เมื่อคีง
ตาขุ่นปานน้ำเข้ากุมเว้าดั่งบ่าวสาว
ยังเล่าแหะแห่นแหล้นหลงเต้นบ่เบิ่งโต
ลูกหลานห้าฮ่มไม้ใจเจ้าเถ้าบ่เป็น
วัดวาบ่เข้าใกล้หันหน้าเข้าแต่ดง
แยงแว่นหัวยุ้มยุ้มกุมเอ้ตั้งแต่โต
บ่ทันคึดถี่ถ้วนกุมต้มตั้งแต่หลาน
หน้าบ่ทันได้ล้างกุมป้อยตั้งแต่หลาน
กินบอนปากแฮ่งฮ้อนดีฮ้ายบ่ฮ่ำเพิง
บาดว่ายามเข้าส้วมแนวนั้นผัดลื่นเขา
คลำแต่ใต้ท้องน้อยศีลห้าบ่คนิง
ศีลธรรมบ่ได้เว้าเทียวเข้าตั้งแต่สวน

จาก : กาพย์ปู่       
 

bullet บาป - บุญ

บุญบาปนี้เป็นคู่คือเงา
คันเฮาพาเล่นพามันเต้นแล่น
เฮานั่งยองย่อเงาก็นั่งลงนำ
คันเฮาโตนลงห้วยภูเขาหลายหลั่น
เงาก็ตามเลี้ยวเก๊าะเกี่ยวพันธนัง
อันนี้สันใดแท้ทั้งสองบุญบาป

เงานั้นไปตามเฮาสู่วันบ่มีเว้น
พามันแอะแอ่นฟ้อนเงานั้นแอ่นนำ
ยามเฮาเอาหลังนอนก็อ่อนลงนอนด้วย
ขึ้นต้นไม้ผาล้านด่านเขา
บ่ได้มียามเหินห่างไกลกันได้
มันก็ติดต่อก้นนำส้นผู้ทำ นั้นแหล่ว

next arrowsคลิกอ่านต่อ  ผญาเกี้ยวพาราสีทั่วไป

redline

backled1

paya

ผญาปริศนา

ปริศนา คือ คำถามให้ฉุกคิด ให้เอาไปเปรียบเทียบในการดำเนินชีวิต

  • กุญชรช้างพลายสารเกิดอยู่ป่า ยังมาอยู่บ้านเมืองกว้างกล่อมขุน
    ช้างเกิดในป่ายังมาอยู่กับผู้คนในเมืองได้
  • กุญชรช้างอัศดรคุณมาก ก็หากหายากแท้ทั้งค่ายบ่มี
    ส่วนว่ายุงยองฮิ้นฝูงไฮเฮือดไต่ บ่ห่อนขี้ไฮ้หาได้คู่เฮือน
    ช้างสัตว์มีคุณหายาก ส่วนริ้นยุงนั้นหาได้อยู่ทั่วไป
  • กุญชรโรช้างแนวสูงศักดิ์ใหญ่ ตายย้อนมดแดงน้อยๆ แนวนั้นก็หากมี
    ช้างสัตว์ใหญ่ แต่ตายด้วยมดแดงตัวน้อย
  • คันได้ขี่ช้างแล้วอย่าดังเปิดดังเหิน อย่าได้เสิ่นๆ หัวแหย่งสิพานพาฮ้าย
    ได้ขึ้นตำแหน่งสูงอย่าทะนงตัว เดี๋ยวจะตกกระป๋องง่ายๆ

isan banhao 4

  • คันได้ขี่ช้างให้หาแหย่งยองหลัง คันบ่ยองแหย่งลงสิบ่สมทรงช้าง
    มันสิเสียศรีเศร้าเสียทรงช้างใหญ่ ให้ขัดสีอยู่สู่มื้องามแท้เลิศคุณ
    ถ้าได้ตำแหน่ง ยศศักดิ์ แล้ว ก็ให้ดูแลเอาใจใส่ให้เจริญก้าวหน้าต่อไป
  • คันบ่ออกจากบ้านบ่เห็นด่านแดนไกล คันบ่ไปหาเฮียนก็บ่มีความฮู้
    ถ้าไม่ออกเดินทางก็จะไม่มีประสบการณ์
  • คันคากน้อยยังได้ฮบพญาแถน ยังได้ครองนครขวางนั่งเมืองเป็นเจ้า
    คางคกยังได้รบกับพญาแถน จนได้ครองเมือง อย่าท้อถอย
  • กากับนกเค้าบ่เข้าฮ่อมแกวกัน หนูกับแมวบ่อยู่นำกันได้
    คือดังหมีกับไม้พันทนังค้อป่า จอนฟอนกับเห่าห้อมบ่มีมื้อถืกกัน
    ศัตรูคู่แค้นไม่อาจอยู่ร่วมกัน ก็จงหลีกให้ห่างๆ
  • คันสิเอาะอ่อมจ้ำอย่าได้ใส่น้ำหลาย มันสิใสเจงเลงบ่เป็นตาจ้ำ
    ถ้าจะทำอ่อมให้ใส่น้ำน้อยๆ เพื่อความอร่อย
  • คันหากมีสองแล้วบ่กลัวไผอย่าฟ้าวหว่า บาดห่าเป็นฮ้างหม้ายสิมาโอ้ใส่เขา
    ถ้ามีคู่ครองแล้วอย่าเพิ่งปรามาสเขา หากถึงคราวเป็นหม้ายอาจจะได้ช่วยเหลือ
  • คันได้นั่งบ้านเป็นเอกสูงศักดิ์ อย่าได้โวๆ เสียงลื่นคนทั้งค่าย
    ชื่อว่าเป็นนายนี้ให้หวังดีดอมบ่าว คันหากบ่าวบ่พร้อมสิเสียหน้าบาดเดิน
    ถ้าได้เป็นเจ้านายอย่าได้คุยโวข่มเหงบ่าวไพร่ เราจะได้ดีมีคนค้ำจุนก็เพราะคนรอบข้าง

Paya isan 03

สอนหญิง

เป็นหญิงให้ใจอ่อนน้อม คำเว้าอ่อนหวาน เทียมดั่งพธูเผิ้ง หวานเลิงบ่ฮู้หล้า
เป็นหญิงอย่าได้ปากกล่าวต้าน คำกล้ากว่าชาย ให้ค่อยเอาใจตั้ง คำโบราณสอนสั่ง
ให้มีใจอ่อนน้อม ประสงค์ตั้งต่อผัว นั้นเนอ ให้คึดกลัวความฮ้าย ใดดีให้คึดฮ่ำ
แม่นว่ามีโฉมฮ้าย ฉันใดอย่าประมาท เป็นแต่ชาติก่อนพุ้น บุญสร้างแต่หลัง
 
      อันว่าอิตถีเชื้อ ฝูงหญิงงามยิ่ง เห็นว่าได้มิ่งต้น อย่าโงแง้นว่าโต นั้นเนอ
อย่าได้เอโกอ้าง บ่เอาไผเป็นที่เผิ่ง แพงเอย ชาติที่นอนป่าฮ้าย แปลงห้างให้ใหญ่ดี
เห็นว่ามีทางซ้อน อย่าหวังคอยสิวางง่าย หลายเนอ บาดน้ำเขินขาดแล้ง ตมสิแห้งไหง่ผง
ชาติที่แนวนามบ้ง แปนโตกาสิตอด เอาแหล่ว ให้เจ้าเป็นดั่งม้อน ใยหุ้มห่อตัว
 
      ชาติที่เป็นหญิงให้ มีชายเพทียมพ่าง หญิงบ่มีคู่ซ้อนเสียเชื้อชาติหญิง ยิ่งแหล่ว
คันสิเอาผัว ให้ถามนามนักปราชญ์ ชาติที่ยาวลื่นด้าน งามแย้มก็อย่าเอาเจ้าเฮย
ชายใดเนาในห้อง เฮือนตนเป็นวาด สัพพะการเวียกเว้า กระทำสร้างสู่วัน
ชายนั้นหญิงใดได้สบายใจหมดทุกสิ่ง จริงแหล่ว พากันลุลาภได้ ของเข้ามั่งมูน
ยูถ่างทำบุญสร้าง ทานไปบ่ได้ขาด ให้มีใจอ่อนน้อมประสงค์ตั้งต่อทาน นั้นเนอ

isan banhao 5

next green คลิกอ่านต่อ ผญาภาษิตสะกิดใจ 

redline

backled1

Loading...

isan word tip

isangate net 345x250

ppor blog 345x250

adv 345x200 1

นโยบายความเป็นส่วนตัว Our Policy

ยินดีต้อนรับสู่ประตูอีสานบ้านเฮา เว็บไซต์ของเรา ใช้คุกกี้ (Cookies) เพื่อให้ท่านได้รับประสบการณ์การใช้งานที่ดียิ่งขึ้น อ่านนโยบายคุ้มครองข้อมูลส่วนบุคคล (Privacy Policy) และนโยบายคุกกี้ (Cookie Policy)